ტაიკა ვაიტიტი კრიტიკოსებს დაუპირისპირდა: რეჟისორმა უარყოფითი რეცენზიების ავტორებს „დაკარგული სულები“ უწოდა

ახალი ფილმის, „კლარა და მზის“ რეჟისორი ტაიკა ვაიტიტი თავისი ნამუშევრის მიმართ გამოთქმულ უარყოფით შეფასებებს გამოეხმაურა. რეჟისორმა Instagram-ზე ფილმის პოსტერი გამოაქვეყნა, სადაც ხაზი გაუსვა კონტრასტს მაყურებელთა და კრიტიკოსთა შეფასებებს შორის Rotten Tomatoes-ზე.

პოსტერის მიხედვით, ფილმს მაყურებელთა 78-პროცენტიანი რეიტინგი აქვს, ხოლო კრიტიკოსების შეფასება მხოლოდ 28 პროცენტს შეადგენს. ვაიტიტიმ დაწერა, რომ თითქმის 15 წელია არ წაუკითხავს რეცენზია, რომელიც მის ან მისი კოლეგების შემოქმედებას ეხება, თუმცა ხალხს უსმენს: „ამ ჰელოუინს გავიხსენოთ ის სევდიანი, დაკარგული სულები, რომლებმაც ხელოვანობის ოცნებას ვერ მიაღწიეს და ამიტომ კრიტიკოსები გახდნენ“. რეჟისორმა დასძინა, რომ ეს ის ადამიანები არიან, ვისაც მისი ფილმი „კურდღელი ჯოჯოც“ სძულდათ, და მათ შეუსაბამო, მოძველებული და ურნაში გადასაგდები უწოდა.

ფილმი კინოთეატრებში გასულ კვირას გამოვიდა და ჩრდილოეთ ამერიკის 880 კინოთეატრში სადებიუტო უქმეებზე დაახლოებით 725,000 დოლარი გამოიმუშავა, რის გამოც ათეულს მიღმა დარჩა. ამ დროისთვის ფილმის მსოფლიო შემოსავალი დაახლოებით 1.7 მილიონ დოლარს შეადგენს.

„კლარა და მზე“ კაზუო იშიგუროს 2021 წლის ამავე სახელწოდების რომანის ადაპტაციაა და დისტოპიურ მომავალში ვითარდება. სიუჟეტი მოგვითხრობს მოძველებულ კომპანიონ ანდროიდზე, რომელიც ცდილობს დაუახლოვდეს თავის ახალ მფლობელს, ავადმყოფობასთან მებრძოლ ახალგაზრდა გოგონას, ჯოზის. ფილმში მთავარ როლებს ჯენა ორტეგა და ემი ადამსი ასრულებენ.