იჰლავას დოკუმენტური ფილმების ფესტივალზე ჯეიმს ლონგლის „მოჰაბატმა“ გაიმარჯვა

იჰლავას დოკუმენტური ფილმების ფესტივალზე Opus Bonum-ის სექციის გამარჯვებული ჯეიმს ლონგლის ფილმი „მოჰაბატი“ (Mohabat) გახდა. სურათი, რომლის პროდიუსერებიც მოჰამად შარიფ ჰოტაკი, თავად რეჟისორი და „ოსკარის“ მფლობელი ალექს გიბნი არიან, 12 წლის ბიჭის, მოჰაბატის შესახებ მოგვითხრობს, რომელიც დრონის დარტყმის შედეგად მამის დაღუპვის შემდეგ მშობლების მზრუნველობის გარეშე რჩება და ქალაქის ბავშვთა სახლში ხვდება.

ფესტივალის ჟიურიმ ფილმს საგულდაგულოდ გამოკვლეული და დახვეწილად შექმნილი უწოდა. ჟიურის შეფასებით, ბიჭის თავის ორ უფროს ძმასთან ურთიერთობასა და სოფლის სკოლის ცხოვრების წესებსა და რიტმებზე მოთმინებითი დაკვირვებით, ფილმი ქმნის ინდივიდის, ოჯახისა და საზოგადოების კომპლექსურ და თანამგრძნობ პორტრეტს, რომელიც ჩვეულ კლიშეებს შლის. Opus Bonum-ის სექციაში ასევე აღინიშნა ნონა გიუნაშვილის ფილმი „Sacred Songs“, რომელმაც ცენტრალური და აღმოსავლეთ ევროპის საუკეთესო დოკუმენტური ფილმის ჯილდო მოიპოვა.

საკონკურსო პროგრამა Testimonies-ში მთავარი პრიზი ბრაიდი ო'კონორის ნამუშევარმა „Barbara Forever“ დაიმსახურა. ფილმი ეძღვნება გარდაცვლილ არტისტსა და აქტივისტს, ბარბარა ჰამერს. ჟიურიმ მას უწოდა შთამბეჭდავი კინემატოგრაფიული კვლევა, რომელიც ერთდროულად არღვევს რამდენიმე ტაბუს: ლესბოსურ და ქალთა ემანსიპაციას, დაბერებასა და უკურნებელ სენს. ამასთან, მასში მაღალშემოქმედებითადაა გამოყენებული თავად მთავარი გმირის მიერ ხუთი ათწლეულის განმავლობაში გადაღებული ექსპერიმენტული კადრები.

გარდა ამისა, ფესტივალზე მსოფლიო კინემატოგრაფში შეტანილი წვლილისთვის ჯილდო გადაეცა ვიეტნამელ-ამერიკელ რეჟისორ ტრინ ტ. მინ-ჰას.