ჯონ ტურტუროს ახალმა კრიმინალურმა თრილერმა კინოგაქირავებაში შემოსავალი 1173%-ით გაზარდა

სერიალ „განცალკევების“ ვარსკვლავის, ჯონ ტურტუროს ახალმა კრიმინალურმა თრილერმა „The Only Living Pickpocket in New York“ ამერიკულ კინოგაქირავებაში შთამბეჭდავ წარმატებას მიაღწია. ეკრანების რაოდენობის გაზრდის შემდეგ ფილმის ბილეთების გაყიდვები 1173%-ით გაიზარდა და გასულ უქმეებზე 1.765 მილიონი დოლარი შეადგინა.

ნოა სეგანის რეჟისურითა და სცენარით შექმნილი სურათის მსოფლიო პრემიერა სანდენსის კინოფესტივალზე შედგა, სადაც კრიტიკოსების მხრიდან ტურტუროს მთავარმა როლმა მაღალი შეფასებები დაიმსახურა. 23 ოქტომბერს ფილმი აშშ-ის კინოთეატრებში თავდაპირველად მხოლოდ ექვს ლოკაციაზე გამოვიდა, თუმცა გასულ უქმეებზე მისი ჩვენება 1112 ლოკაციამდე გაფართოვდა. შედეგად, მან გადაუსწრო ისეთ პროექტებს, როგორებიცაა ბრედ პიტის „Heart of the Beast“, ენ ჰეთეუეის მონაწილეობით შექმნილი კოლინ ჰუვერის ადაპტაცია „Verity“ და ჯეინ ოსტინის „გრძნობა და გონების“ უახლესი ეკრანიზაცია, ხოლო თითოეულ კინოთეატრზე საშუალო შემოსავლით რეჟისორ კიტაო საკურაის ახალ ფილმს „Street Fighter“ აჯობა.

პროექტში ჯონ ტურტუროსთან ერთად სხვა ცნობილი მსახიობებიც მონაწილეობენ: „Breaking Bad“-ის ვარსკვლავი ჯანკარლო ესპოზიტო დეტექტივ ალან უორენის როლს ასრულებს. სამსახიობო გუნდში ასევე შედიან ტატიანა მასლანი, სტივ ბუშემი, ჯეიმი ლი კერტისი და ჯონ ტურტუროს ბიძაშვილი, აიდა ტურტურო. რეჟისორი ნოა სეგანი კი ყველაზე მეტად რაიან ჯონსონთან ერთად მუშაობით არის ცნობილი.

პარალელურად, ჯონ ტურტურო „განცალკევების“ მესამე სეზონში დაბრუნდება. ციურიხის კინოფესტივალზე გამართული მასტერკლასის დროს მსახიობმა დაადასტურა, რომ სერიალის გაგრძელებაში მონაწილეობას მიიღებს ადამ სკოტთან და ბრიტ ლოუერთან ერთად. სერიალის მესამე სეზონის წარმოება ამჟამად მიმდინარეობს.