დიუნის მხატვარმა მესამე ნაწილისთვის 55-ტონიანი კოსმოსური ხომალდი ააგო

დამდგმელმა მხატვარმა პატრის ვერმეტმა SCAD სავანის კინოფესტივალზე განაცხადა, რომ ფრენჩაიზის მესამე და დასკვნითი ნაწილი მაყურებელს განსაცვიფრებელ სანახაობას შესთავაზებს. ვერმეტმა ღონისძიებაზე გამოცემა Variety-სგან მიიღო ჯილდო შემოქმედებითი გავლენისთვის და ფილმის მასშტაბურ დეკორაციებზე ისაუბრა.

მხატვრის თქმით, რეჟისორ დენი ვილნევის მთავარი დავალება იყო, რომ დეკორაციები არ განმეორებულიყო. ფილმის გამხსნელი სცენისთვის, სადაც მოქმედება შავი ქვიშის სივრცეში და წვიმაში ვითარდება, გადამღებმა ჯგუფმა 55-ტონიანი კოსმოსური ხომალდი ააგო. კონსტრუქცია მიწაში ჩაფლეს, რის გამოც ყოველ ორ დღეში ამწით მისი ამოწევა და სპეციალური სისტემით წყლის ამოტუმბვა ხდებოდა საჭირო. ვერმეტმა აღნიშნა, რომ აშენდა მხოლოდ ერთი ხომალდი, რომლის ინტერიერი და ექსტერიერი 360 გრადუსით ჩანს.

„დიუნი: ნაწილი მესამე“ ფრენკ ჰერბერტის რომანით, „დიუნის მესიით“ არის შთაგონებული. სიუჟეტი წინა ფილმის მოვლენებიდან 17 წლის შემდეგ ვითარდება და ტიმოთი შალამეს გმირის, პოლ ატრეიდესის იმპერატორად მმართველობის შედეგებს იკვლევს. ფილმი კინოგაქირავებაში 18 დეკემბერს გამოდის.

პატრის ვერმეტსა და დენი ვილნევს ხანგრძლივი შემოქმედებითი თანამშრომლობა აკავშირებთ: მათ ერთად იმუშავეს ისეთ პროექტებზე, როგორიცაა „მტერი“, „სიკარიო“, „ჩამოსვლა“ და „დიუნი“. მხატვარმა აღნიშნა, რომ ფანტასტიკურ სამყაროში არსებული ნებისმიერი ობიექტი რეალობას უნდა ეფუძნებოდეს და ისტორიას ყვებოდეს.