ჯენიფერ ლოურენსი „იქს-ადამიანების“ ფრენჩაიზში მისტიკის როლს აღარ დაუბრუნდება

მსახიობმა ჯენიფერ ლოურენსმა გამოცემა Allure-თან ინტერვიუში საბოლოოდ გამორიცხა „იქს-ადამიანების“ ფრენჩაიზში პერსონაჟ მისტიკის როლზე დაბრუნება. მსახიობმა პირდაპირ განაცხადა, რომ ფორმის შემცვლელი მუტანტის განსახიერებას აღარ აპირებს, რის მთავარ მიზეზადაც გრიმის რთული და დამღლელი პროცესი დაასახელა.

ლოურენსის თქმით, 2011 წლის ფილმის „იქს-ადამიანები: პირველი კლასი“ გადაღებებზე გრიმის სკამში რვა საათამდე გატარებულმა დრომ ის ზღვრამდე მიიყვანა. მსახიობმა აღნიშნა, რომ ამ გამოცდილებამ ასწავლა, თუ რა ცოტა ძილით შეუძლია ფუნქციონირება და რა მოსდის ადამიანის გონებას, როდესაც მოთმინების ზღვარს აღწევს. მან ასევე ხაზი გაუსვა, რომ ყველაზე მეტად ტრიუკების შესრულება მოსწონდა თავის დუბლიორ რენე მანიმეიკერთან ერთად, ხოლო ყველაზე მეტად საღებავი არ მოსწონდა.

ჯენიფერ ლოურენსმა მისტიკის როლი სულ ოთხ ფილმში შეასრულა: „იქს-ადამიანები: პირველი კლასი“, „იქს-ადამიანები: მომავალი წარსულის დღეები“, „იქს-ადამიანები: აპოკალიფსი“ და „იქს-ადამიანები: ბნელი ფენიქსი“. ყოველ მომდევნო ნაწილში მისი ლურჯკანიანი გარეგნობა თანდათან მცირდებოდა, ბოლოს კი, „ბნელ ფენიქსში“, მისი პერსონაჟი მოკლეს. ლოურენსამდე ამ გმირს ორიგინალ ტრილოგიაში რებეკა რომეინი თამაშობდა, რომელიც ამ როლს ორი ათწლეულის შემდეგ მომავალ ფილმში „შურისმაძიებლები: განკითხვის დღე“ კვლავ შეასრულებს.

ამ ეტაპზე მარველის სტუდია „იქს-ადამიანების“ ფრენჩაიზის გადატვირთვაზე მუშაობს. მიუხედავად იმისა, რომ მთავარი სამსახიობო შემადგენლობა უკვე გამოცხადებულია, ჯერჯერობით უცნობია, ვინ ითამაშებს მისტიკის როლს.